Sumarið að koma

Já það ber ekki á öðru en að sumarið sé bara að skella á eins og sjá má í þessari færslu. Hún Sigga mín hefur ekki haft mikinn tíma í að blogga undanfarið vegna anna í nýju (gömlu) vinnunni svo ég gat ekki stillt mig um að splæsa í eina færslu fyrir hana. Þegar ég kom heim úr vinnunni á laugardagskvöldið voru þess skýr ummerki að sumarið er komið í Hafnarfjörðinn. Alla vegar hér í Arnarhrauninu.

Þegar litið var út á sólpall kom í ljós að Sigga er búin að ná í einn sólbekk inn í kompu og er byrjuð að safna lit fyrir sumarið. Það má sko engan tíma missa. Jú, ástkona mín skellti sér í sólbað á laugardaginn í stað þess að sitja fyrir framan tölvu og blogga. Sem er jú heilbrigðara.

Skítt með að tjaldurinn hafi sést á austfjörðum fyrir helgi og lóan sé að kalla um borð úti í löndum á leið upp á klaka. Sólbekkirnir eru farnir að sjást í Hafnarfirðinum. Innan um snjóskafla. Ég splæsti í eina mynd fyrir ykkur sem ég læt fylgja með þessari færslu. Takið eftir hvíta teppinu á sólbekknum. Það vantar víst aðeins upp á hitastigið ennþá. Eeeeeen þetta er allt að koma.

Kv. Hansi.